Նախախորհրդարան 2013-2015 ապրիլ
Հիմնադիր
խորհրդարան
2015-ի հունվարից
ռեժիմի հեռացում 2015-ի ապրիլի 24-ից
ժամանակավոր
կառավարում
մինչև 2 տարի
արտահերթ ընտրություններ
Նոր որակի Հայաստան
 
ՀԻՄՆԱԴԻՐ ԽՈՐՀՐԴԱՐԱՆԸ ֆինանսավորվում է բացառապես հայ ազգի կողմից: Քո երկիրն ունի հենց ՔՈ՛ կարիքը
Ընտրություններին մասնակցել ցանկացողները նպաստում են ռեժիմի վերարտադրությանը. Ալեք Ենիգոմշյան
January 23, 2017     (344 դիտւմ)

Ապրիլի 2-ին կայանալիք խորհրդարանական ընտրությունների շուրջ araratnews.am-ը զրուցել է «Հիմնադիր խորհրդարանի» անդամ Ալեք Ենիգոմշյանի հետ:

Նախընտրական գործընթացների բուռն շրջան է, ի՞նչ մթնոլորտ է «Հիմնադիր խորհրդարանում», ո՞րն է լինելու ձեր դերակատարումն առաջիկա խորհրդարանական ընտրություններում:

«Հիմնադիր խորհրդարանը» իր սկզբնավորման փուլից ձևավորվել է այն խոր համոզումով, որ ներկա վարչակարգի օրոք Հայաստանում իսկական ընտրություններ չեն կարող լինել, հետևաբար, «Հիմնադիր խորհրդարանը» բացառում է «ընտրություններին» մասնակցությունը եւ «ընտրությունների» միջոցով իրավիճակ փոխելու հավանականությունը: Մենք չկանք այս աժիոտաժների մեջ, հետևաբար ապրիլի 2-ի «ընտրություններին» մասնակցելու մտադրություն էլ չենք ունեցել եւ չունենք: Մենք այն համոզմանն ենք, որ քանի այս վարչախումբն է իշխում Հայաստանում, միայն ժողովրդի քաղաքացիական անհնազանդությամբ եւ ընդվզմամբ հնարավոր է իրավիճակ փոխել, այլ ոչ թե այս վարչախմբի վերահսկած ընտրություններով:

Կարծում եք` կատարված օրենսդրական փոփոխություննե՞րն էլ չեն նպաստի ընտրությունների որակի բարելավմանը:

Ո՛չ: Անցած երկու տասնամյակների ընթացքում ընտրական գործընթացի խութերի կապակցությամբ, որոնք մատնանշվել են,  թե այս կամ այն պատճառով ընտրություններն արդար եւ ազատ չեն կարող լինել, այս վարչախումբը կատարել է որոշակի կոսմետիկ փոփոխություններ, բայց մյուս կողմից` այնպիսի փոփոխություններ է արել, որոնք անիմաստ են դարձնում այդ կոսմետիկ փոփոխությունները: Սահմանադրությունը, ապա Ընտրական օրենսգիրքը փոխվեցին այս իշխանությունների վերարտադրությունն ապահովելու համար, մնացած բոլոր կոսմետիկ փոփոխությունները որևէ էական արդյունքի չեն հանգեցնի:

«Հիմնադիր խորհրդարանը» պնդում է, որ ընտրությունների միջոցով անհնար է փոփոխությունների հասնել, ասում եք՝ միակ ճանապարհը ընդվզումն է, բայց հուլիսյան հայտնի դեպքերը ցույց տվեցին, որ այդ տարբերակը եւս արդյունավետ չէ: Ի՞նչ կասեք:

Ես չէի ասի, որ հուլիսյան ընդվզումից, «Սասնա ծռերի» ապստամբությունից  պետք է հետևություն անել, թե ընդվզման միջոցով հնարավոր չէ հասնել փոփոխության: 1995 թվականից ի վեր ընտրություններն ապացուցել են իրենց անհուսալիությունը, իսկ ընդվզման փորձ ընդամենը մեկ անգամ է եղել, եւ դա համոզված եմ ասում՝ մոտեցրեց էական փոփոխության: Ճիշտ է՝ վերջնական արդյունք չեղավ, բայց իսկական փոփոխության հնարավորություններն իսկապես շոշափելի էին: Թե ինչու հուլիսը չհասցրեց փոփոխության` դա քննարկելու, վերլուծելու հարց է, բայց հետևություն անել, որ հուլիսյան զարգացումների պատճառով նաեւ այդ ճանապարհը ճիշտ ուղին չէ, կարծում եմ, սխալ է:

«Հիմնադիր խորհրդարանն» ի՞նչ ծրագրեր ունի` ուղղակի չմասնակցել եւ զբաղեցնել պասիվ դի՞րք, թե՞ այլ որոշում ունեք, օրինակ` կրկին ընդվզումների դիմեք:

Մենք միշտ էլ ակտիվ անհնազանդության կողմնակից ենք, եւ տվյալ դեպքում էլ՝ ակտիվ բոյկոտի, ոչ թե պասիվ՝ պարզապես չմասնակցելով, բայց դա չի նշանակում, որ այս «ընտրական գործընթացի» ընթացքում այդ ակտիվ բոյկոտը արդյունքներ կտա: Հակառակը` ասում ենք, որ նման բան ապրիլին չի լինի, դա շարունակվող գործընթաց է, որի կարևոր փուլերից մեկը կլինի ընտրական եւ հետընտրական գործընթացը, սակայն մեր գործունեությունը 100 տոկոսով դրանով չի պայմանավորվելու:

Պարո՛ն Ենիգոմշյան, «Հիմնադիր խորհրդարանի» անդամ Արայիկ Խանդոյանը համենայն դեպս ՏԻՄ ընտրությունների ժամանակ առաջադրվեց, հնարավո՞ր է առաջիկա ընտրություններում էլ լինեն անհատներ, որոնք չկիսեն ձեր մոտեցումը եւ մասնակցեն ընտրություններին:

Նման բան չկա, եւ վստահ եմ, որ չի լինի: Արայիկ Խանդոյանի դեպքը չպետք է մեկնաբանել որպես «Հիմնադիր խորհրդարանի» սկզբունքից շեղում, որովհետև, եթե, օրինակ, Խանդոյանը ներկայանար Հրազդանի ընտրություններում որպես ավագանու անդամ, ապա այդ ժամանակ կարելի էր ասել՝ շեղում: Տվյալ դեպքում թեկնածուն ներկայացավ իր ծննդավայրում. սա կարևոր է: Իհարկե, էլի ինքը տարբերվեց «Հիմնադիր խորհրդարանի» մոտեցումից, ես չեմ ասում՝ բացարձակ տարբերություն չկա, բայց իմ ասածն այն է, որ այս դեպքում հիմնական գործոնն իր ծննդավայրը լինելն է:

Տարբեր կուսակցություններ արդեն դաշինքներ կազմելու եւ ընտրություններին դաշինքներով մասնակցելու հայտ են ներկայացրել, ինչպե՞ս եք վերաբերվում այդ միավորումներին:

Մեր համոզմամբ՝ ընտրություններին մասնակցել ցանկացողները ճիշտ ճանապարհ չեն ընտրել. ի վերջո, այդ մասնակցությամբ նպաստում են այս ռեժիմի վերարտադրությանը:

Եվ վերջին հարցը` «Ժառանգություն» կուսակցության մոտեցումներին Ձեր գնահատականը:

Բոլորս ականատես ենք, թե «Ժառանգություն» կուսակցության ներսում ինչ է կատարվում, նրանց համար ոչ դուրեկան զարգացումներ են ընթանում: Մեզ համար բացարձակ ողջունելի չեն այդ մոտեցումները, բայց դա նրանց որոշումն է:

Շողիկ Գալստյան

– See more at: http://araratnews.am/ehntruthyunnerin-masnakcel-cankacoghnereh-npastum-en-rezhimi-verartadruthyaneh-alekh-yenigomshyan/#sthash.jEYU8ltA.dpuf

Մեկնաբանություններ